De Nobile Antonietta

Si cunta ca Giufà 'na matina si nni ij' a finocchi, e ad arricuglirisi a lu paisi si arridducì di notti; nna mentri caminava cc'era la Luna ed era annuvulata, e la Luna affacciava e cuddava; s'assetta 'n capu 'na petra e si minti a taliari la Luna ca affacciava e cuddava, e cci dicia quann'affacciava:
- Affaccia, affaccia; quannu cuddava cci dicia:
- Codda, codda, - e 'un allintava di diri
- Affaccia, affaccia; codda codda!

'Ntantu ddà sutta la via cc'eranu du' latri ca scurciavanu 'na vitedda, ca l'avianu arrubbatu; quannu 'ntisiru diri:
- Affaccia e codda, - si scantavanu ca vinía la Giustizia; appizzanu a cùrriri e lassanu la carni.

Giufà quannu vitti curriri a li du latri, ij' a vìdiri chi cc'era, e trova la vitedda scurciata; piglia lu cutieddu, accumencia a tagliari carni e nni jinghi lu saccu e si nni va: arrivannu nni sò mà':
- Mà, aprìti.

Sò matri cci dici:
- Pricchì vinisti accussi notti?

- Vinni notti ca purtavu la carni e dumani l'âti a vìnniri tutta , ca li dinari mi sièrvinu.

Cci dissi sô matri:
- Dumani ti nni va' di fora arrieri, ca ia vinnu la carni.

Quannu la matina fu juornu Giufà si nni ij' di fora, e sò matri vinni' tutta la carni.

La sira vinni Giufà e cci dissi:
- Mà' li vinnistivu la carni?

- Si, la detti a cridenza a li muschi.

- E li grana quannu vi l'hannu a dari?

- Quannu l'hannu.

Nquà passàru ottu jorna, e dinari li muschi 'un ni purtavanu; si parti Giufà e va nni lu Judici e cci dici:
- Signuri Jùdici, vuogliu fatta ghiustizia, ca detti la carni a cridenza a li muschi e 'un hannu vinutu a pagarimi.

Lu Jùdici cci dissi:
- Ti dugnu pri sintenza ca unni li vidi l'ammazzi.

Ghiustu ghiustu posa 'na musca supra la testa di lu propria Jùdici, Giufà appizza c'un pugnu e cci rumpi la testa a lu Judici.

Casteltermini
trascritta da Giuseppe Pitrè
in Fiabe, novelle e racconti popolari siciliani

Variante

Giufà 'nni lu Jùdici.

Lu jùdici si misi a ridiri, e cci dissi:
- Unni vidi muschi, e tu ci duni pugna

Giustu giustu, mentri lu jùdici parrava, 'na musca cci iju 'nta la facci.
'Ncugna Giufà e c'un pugnu cci frica lu nasu.