variante

Giufà e li latri

Antonietta De Nobile

Caminannu pi 'na campagna sularina, 'na vota a Giufà cci vinni di fari acqua.
Ddoppu chi finiu, sapiti com' è quannu si piscia? ca va facennu tanti viuledda (rivoli) e curri. Giufà si vota cu li viuledda e cci dici:
- Tu pigghi pi ccà; tu pigghi di ccà, tu pigghi pi ccà (parrannu pi l'arina), e io pigghiu pi ccà; e scinníu.

Giustu giustu ddà sutta cc'era 'na grutta, e cc'eranu 'na pocu di latri chi si stavanu spartennu 'na pocu di dinari. Sentinu accussì, dici:
- Ah! pi santii Dima! ca la Giustizia viniu a pigghiàrìnni, e nni sta atturniannu! e scapparu lassannu li dinari ddà.

Scinni Giufà, vidi sti gran dinari: nè gattu fu nè dammaggiu fici, e si' l'i pìgghiau.

Palermo
 trascritto da Giuseppe Pitrè
 in Fiabe, novelle, racconti popolari siciliani