altre versioni: Canta la notti, Giufà e lu cardinali

Giufà e lu canta-matinu

Si cunta ca a tiempu di Giufà 'na matina nni I'arba mentri iddu era curcatu, senti sunari la fiscaliettu e spìjà' a sò matri:
- Mà', cu' jè chissu chi passa?

Sò matri cci dici:
- Chissu è lu canta-matinu.

Ogni matina passava stu canta-matinu; 'na matina si susi Giufà e va a'mmazza stu canta-matinu, ca era un omu chi sunava lu fiscaliettu; pùa si nni ij' nni sò matri e cci dissi:
- Mà', l'ammazzavu lu canta-matinu.

Sò matri sintìennu ch'ammazzà' l'omu chi sunava lu fiscaliettu lu va a piglia, lu porta jintra e lu jetta nni lu puzzu, ca era vacanti senza acqua.

Quannu Giufà ammazzà' a l'omu, si nn' addunà unu, e lu ij' a dici a la sò famiglia; subbitu si pattinu e nni fannu stanza a la Ghiustizia comu Gi'ufà amnmazzau a lu canta-matinu.

La matri di Giufà, ca era 'sperta, pinsà' ch'avía un crastu ; l'ammazza e lu jetta nni lu puzzu. La Ghiustizia si nni va nni Giufà pri fari la 'virifica di lu muortu; la famiglia di lu muortu cci ij' 'nzèmmula. Lu Jùdici cci dissi a Giufà:
- Unni lu purtasti lu muortu?

Rispunni Giufà, pricchì era babbu:
- la lu jittavu nni lu puzzu.

Attaccaru a Giufà cu 'na corda e lu calàru nni lu puzzu; arrivannu a lu funnu di lu puzzu, minti a circari, e trova e tocca lana e cci dici a li figli di lu muortu:
- Nn'aví a lana tò pà' ?

- Mà pà' 'un n'avia lana.

- Chistu havi la lana; 'un è tò pà' -

Pùa tocca la cuda:
- Nn'avía cuda tò pà'?

- Mà pà' 'un n'avia cuda.

- 'Nquà un è tò pà' -  

Pùa tocca, chavia quattru piedi, e dici:
- Quantu piedi avia tò pà'?

- Mà pà' du' piedi avía.

Rispunni Giufà:
- Chistu havi quattru piedi; 'un é tò pà' -

Pùa tocca la testa, e cci dici:
- Nn'avia corna tò pà'?

Rispunninu li figli:
- Mà pà' 'un n'avia corna,

Rispunni Giufà:
- Chistu havi li corna ; 'un è tò pà'.

Rispanni lu Judici:
- Giufà, o cu li corna o cu la lana acchiànalu.

Tiranu a Giufà cu lu crastu 'n cuoddu, la Ghitistizia vitti ca era veru cràstu, e lassà' liberu a Gìufà.

Casteltermini
trascritto da Giuseppe Pitrè
in Fiabe, Novelle e racconti popolari siciliani