Li Piscaturi

 
 1.
Supra lu scogghiu
Di Mustazzola
L'aipa vola,
L'alba si fà.
Picciotti beddi,
Viniti a mari;
L'acqua su' chiari,
La varca è ccà.

2.
Sunati brogni,
Figghi di l'unni,
Ca vi rispunni
Prontu l'olė.
Concavi grutti,
Via risunati,
Arrisbigghiati
L'ecu chi c'è.

3.
Sta gran chiaria
Sparsa d'intornu
D'un bellu jornu
Fidi ci fa.
Un frischiceddu,
Chi appena ciata,
L'unna salata
'Ngrispannu va.

4.
Deh veni, o Dori,
Vuci d'argentu,
Quintu elementu,
Novu Perù;
Veni a cantari
Dda canzunedda:
Un'anciledda
E forsi chiù.

5.
Ci voggiu a Nici
Di pettu quatru,
Chi l'occhiu latru
Muvennu va.
La sua prisenza
L'almi ristora,
Comu l'aurora
L'ervi d'està.

6.
Cinta à la frunti
Di juncu e d'arca;
E nun s'imbarca
Nici ! pirchi ?
Nici pretenni
L'autri imbarcari,
Nici piscari
Soli accussi.

7.
Raisi Andria
Pripara l'amu;
Iddù è lu chiamu,
Ecculu dda.
Avi 'na riti
Di fina magghia,
Chi la fragagghia
Scupannu va.

8.
Jamu a li nassi;
Oh chi piaciri!
Jamu a vidiri
Chi pisca c'è:
Vidremu sbattiri
Vivi e virmigghi
Scrofani e trigghi
A tinghi-tè.

9.
Lu mari invita,
Lu friscu alletta;
Via, chi s'aspetta?
Via, chi si fa ?
Picciotti beddi,
Viniti a mari,
L'acqui su' chiari,
La varca è ccà.

Puisii siciliani
Abate  Giovanni Meli

www.colapisci.it