Cuntu di Colapisci
omu a metà ppi l'autru versu pisci

Era nicu 
c'ancora mancu caminava 
ca lu battiò 'nto mari u patri 
la matri nun vuleva 
ca sapeva 
quantu la vita dâ marina amara poti ed è 
Lu picciriddu Cola 
'un era tantu bbeddu da vedere 
sulu teneva un occhio glauco ca splenneva 
e l'autru niru niru 
comu la notti ô funnu di ll'abissu 

Cresceva 
casa di piscaturi in facci ô mari 
e 'un cc'era versu di tenerlu fermu 
curreva 
ca na lucertola pareva 
"Cola! 
Cola disgraziatu amaru veni ccà!" 
la matri dispirava di vederlu ricittatu 
"Cola! 
Chi mi hai squagghiu passa pâ casa! 
Sempri 'nta ll'acqua hè stari? 
Cola! 
Avissi a ddivintari virdi e niru com'un pisci!" 

Cu po' sapiri chiddu chi fu?… 
La porta di lu Celu stava spalancata? 
chì San Pitruzzu si ll'avia scurdata… 
O a jettatura di na matri è a cchiù possenti? 
O forse fu perchè lu nicareddu Cola 
stannu sempri 'nta ll'acqua dâ sira a la matina 
annannu arreri ê pisci 
assicutannu 
intr'a na rutta 
'mmucciata 'nta lu funnu 
avia truvatu 
un'àliga russigna curadduzza 

I pisci si la spizzuliavunu veloci? 
E Cola… 
Comu sunnu i picciriddi? 
ca s'unu fa na cosa pigghia e la fannu? 
u stissu Cola 
appoi quannu si tratta di 'nziccari cosi 'nta la bucca 
tutte le peggio porcherie vonnu 'ssaggiari! 
ca un disgraziatu cci avissi a stari 'n coddu 
uri quarti e mumenti! 

Cola lu stissu 
annava e spizzuliava st'erba marina 
tantu ca a la sò casa appoi 
'un cci manciava nenti 
Sò matri dispirava 
"Cola! 
mi lassi u pisci sanu sanu 'nta lu piattu" 
casa di piscatura era 
e pisci si manciava 
"Si non tû manci nenti ti dunu 
dumani e podumani 
ddu piattu hè pulizziari!"

Cola si nni 'mpipava 
a mari si calava 
e spizzuliava 
quest'àliga russigna curadduzza 
Forse fu st'erba 
o la mmaledizzioni di la matri 
fattu si è chi Cola anniricava 
un jornu appressu all'autru 
sempri cchiù niru si faceva 
cu llampi argentu vivu a giru 'nta lu coddu 
ci si juncetteru li jirita di manu di li pedi 
comu a lli papiri 
ppi natari megghiu 
e cci rristavunu 'mmiddati i supra àlighi virdi 

'Un si capiva più 
cos'era? 
Menz'omu menzu pisci 
La genti dû paisi mmummuriava 
a cu na tanticchiedda schifu cci faceva 
e cocchidunu si scantava puru di ddu cosu stranu 
Passava u tempu 
Lu patri nenti diceva 
metteva a barca a mari 
e si nn'annava ô largu 
calava i riti 
travagghiava 
piscava e cunzava 
e sempri mutu stava

La matri inveci ca chianceva 
pregava alla Madonna 
"Madonna 
Madunnuzza 
com'hè fari? 
Nu figghiu sulu fici 
e l'haiu a perdiri pû mari? 
'Jutimi tu 
Madonna Santa Bbenedetta"

La matri inveci ca chianceva 
pregava alla Madonna 
"Madonna 
Madunnuzza 
com'hè fari? 
Nu figghiu sulu fici 
e l'haiu a perdiri pû mari? 
'Jutimi tu 
Madonna Santa Bbenedetta" 
Chiamò i mammani dû paisi ppi spumicari a casa 

"A li quattru cantuneri 
ddà cc'è 
l'Anciulu Gabbrieli 
un pezzu di pani e un pisci 
sta casa m'abbunnisci 
chidda di mali agenti mi cci spirisci 
fora malocchiu 
e fora manciuniamentu di la ggenti 
A nnomu di Ddiu 
e di la Santissima Trinità"

Mi cci livavunu di supra l'occhiatura 
a ddu figghiuzzu ch'idda stissa non capiva 
"A nnomi dû Patri dû Figghiu 
dû Spiritu Santu e dâ Santissima Trinità 
livati u malocchiu e lassati la sanità 
Occhiatura scappisatura 
non mi ha mali sta criatura 
Mi si nni va 'n funnu ô mari 
a unni non c'è turchi 
e mancu li cristiani 
A nnomu di Ddiu 
e di la Santissima trinità"

Ma tutti i cosi nun serviru a nenti
A picca a picca Cola c'aveva comu 'nciuria 'nto paisi Colapisci
si fici avvidiri a la sò casa sempri di menu
appoi non più 
La matri si vestì di nero a lutto 
pir chissu figghiu arrubbatu da lu mari tradituri 
Lu patri sempri mutu 
continuò la vita amara di li piscaturi
Quarche varchino invero si diceva 
c'aveva visto a Colapisci chi nnatava 
'n menzu ê derfini 
chi sautava e cci pareva 
c'aveva salutatu cu li manu a pala 
tuttu cuntentu 
facennu certi savoti 
chi mancu u megghiu pisci cci poteva

Passaru jorna misi anni 
e venne na stagione disgraziata 
nu malutempu chi mancu li cchiù vecchi rricurdava 
e peggiu i peggiu i ddraunari 
i trummi marini 
ca dici ca una nni passava 
e nautra nni viniva 
pareva nu castigu dû Signuri 
Non si sapeva cchiù chi fari 
I bbarchi chi niscevanu ppâ pisca 
na ddraunara e i bbarchi all'anchi all'aria 
e cocchi piscaturi chi mureva

Li poviri casuzza a filarata nnâ la rina 
na ddraunara cce le scoppolava 
E na matina un vecchiu tantu vecchiu 
u zû Pascali 
che aveva statu a mari tutta a vita 
e a ora u mari lu vardava ccu duluri da la riva 
dissi 
"Ccà cci voli Colapisci 
sulu ddu menzu ddiu nni po' sarbari"

'Ccussì mannaru na cummari 
a la casuzza di li genitori 
ca cci cuntò lu fattu 
e si nn'annò 
Lu patri pigliò na vecchia brogna 
chi dici ca u picciriddu Cola 
quannu la sentiva si scialava 
Lu patri la sunava 
e Cola 
"Che bbellu papà sonimmilla ancora… 
… che bbellu papà sonimmilla ancora…" 

E adunqui niscetti di la porta 
e fece rrisuonare quell'urlo lamentoso 
che cci serviva ê naviganti ppi richiamu 
Lu senti Colapisci dal profondo 
e tagghia l'acqua chi pari un piscispata 
vola sull'onde e spuma e schizza 
e ô terzu sonu 
longu 
di la brogna 
già Cola mette un piede 'nta la rina

"Patri chi cc'è? 
Pirchì chiamastivu?" 
"'Ntrasi nnâ casa Cola 
tò matri t'ha parrari" 
e dittu chistu 
cala la testa 
e va a la barca ppi cunzari i riti 
Apri la porta di la casa 'ntica Colapisci 
la matri vidi u figghiu e 
"Cola!" 
l'abbrazza si lu vasa tuttu e chianci 
che a lei che era la matri 
'un cci faceva schifu 
la peddi scagghi scagghi 
l'àlighi 'ncrustati 

Doppu chi seppi 
chi sò figghiu stava bbonu 
"… e nun mi manca nenti ohi mà 
haiu chiddu chi vogghiu 
Sapissi li bbiddizzi di lu mari 
li pianti 
i pisci 
li strani criaturi 
su' tutti amici mé 
mi vonnu bbeni 
non t'ha preoccupari tu 
ppi mia…"

Ddoppu chi fu serena 
la matri cci cuntò di trummi 
quella marine 
di chiddu c'avia dittu u vecchiu zû Pascali
insomma tutti i cosi 
e Cola 
"Matri 
pû bbeni ca ti portu sarà fatto" 
cci detti nu vasuzzu e appo' nisciu 

Andò dal padre chi cunzava i riti 
cci dissi 
"Câ brogna e cû cuteddu 
vui chistu aviti a fari…" 
E cci cuntò na magaria 
S'avianu a ddiri certe parole arcane 
na preghiera 
poi certi signa cu 'n bbastuni 
s'avianu a fari 
lu signu di la cruci 
e appò cu nu cuteddu 
cû manicu di lignu niru 
s'avia a tagghiari a ddraunara 
e dici ca chissa svaniva 'nta ll'aria 
comu si nun cci fussi mai stata 
cce lo spiegò ben bene e ddoppu 

"Diciticcillu ê piscaturi 
ê naviganti 
e sulu a iddi 
chistu è un segretu 
e nuddu havi a sapiri 
da sta manera si tagghiunu li trummi 
Statimi bbonu patri 
iò mi nne 'nnari 
ca forti e lu richiamu di lu mari" 
"In grazia dû Signuri vai 
figghiu" 
E torna a lu cunzari 
nel mentre Colapesce sparisce nell'azzurro

Ddu rritu di la brogna e dû cuteddu 
funzionava 
bbastava diri ddi paroli 
fari ddi signa 
e a trumma ppi malia sfumava 
tantu chi 'nto paisi ci fu na festa ranni 
tutti 'mbriachi 
e ddoppu si ripigghiò a campari comu a pprima

Mettevano li varchi a mari 
calavunu li riti 
piscavunu e cunzavunu 
cunzavunu e piscavunu 
e d'ogni tantu quarcunu non turnava 
pirchì 'nto strittu di Missina 
u Fretum 
cci stavunu du maravigghi perniciusi 
Scilla 
era nomata una 
l'autra Cariddi 

La prima si nni stava 'nta na rutta 
e rapida e vorace rapiva da li barchi i naviganti 
e cci spruppava l'ossa 
chi ddoppu biancheggiavunu 'nta ll'acqui 
L'orribili Cariddi 
ca lu poeta dî poeti Omeru 
chiama fatal vorago 
si ringhiotteva i flutti e ddoppu li sputava

A cu cci capitava 'n menzu era sbintura 
chi puru all'Odisseu cci appi a tuccari 
di vidiri i compagni suoi strazziati da la Scilla 
e di rristari 'npennuliuni supra a Cariddi 
'ttaccatu ôn ramu i ficu siccome un pipistrello 
mentri Cariddi sutta rrunguliava 
comu a un Cerberu 'rraggiatu e mortu i fami 

Da sempre sti disgrazie 
rendevano u passaggiu 'nta lu strittu periglioso 
e puru fra la ggenti di lu Faru 
chi puru conosceva u mari e li correnti 
cci stava cu partiva e non turnava 
Nu jornu u zû Pascali 
chi stava sempri sittatu in facci ô mari 
e picca parrava 
dissi

"Avemu annari in processioni 
tuttu u paisi 
a casa i Colapisci 
l'avissumu a chiamari 
ca sulu la potenza di nu ddiu nni po' sarbari" 
e accussì fecero 
purtannu un grosso ciru innanzi 
sunannu tutti i brogni 
lu patri i Colapisci in testa 
faceva u capobbanda 
la matri 
cu nu vilu niru 'n capu 
pareva la Madonna Ddulurata

'Nto llampu si vittiru nnavanti a Colapisci
ca sbrilluzziava nnâ la notti scura
ê vampi di li fochi ardenti 
a fodda mossi un passu arreri bbaddariannu 
quarcunu si signò tuttu scantatu 
li matri cci mittevunu li manu avanti all'occhi ê figghi 
e cu teneva lu cappeddu si lu tolse 
"Pirchì chiamastu? 
Chi vuliti?" 

Nuddu parrava 
chi cci mancava u ciatu 
erunu sturduti 
per quella apparizione subbitanea 
"Matruzza bbedda 
parrati vui 
dicitimi chi fu" 
La matri i Colapisci pareva menza morta
"Figghiu! 
Ccà troppa ggenti morsi 
per via di quelli due mostri marini 
Scilla 
e Cariddi 
e lu paisi tuttu voli ajutu 
e tuttu vinni ccà 
e ti nni prega 
e iò chi su' tò matri 
puru ti pregu" 

Stava p'addinucchiarisi la donna 
e Cola 
"Matri 
avete chiesto 
e sarà fatto 
per quell'amore che vi porto in cuore 
sarà fatto… 
E vui sintiti bbonu" 
cci dissi a quella folla riunita 
"Ddumati i fochi nnâ sta notti hannu a rristari 
finu â mmatina 
chi si si stutunu iò nun tornu e moru 
prigati a lu Signuri Bbenedittu in coru 
ca mi scanzassi nni la lotta la rruvina" 

Vutau li spaddi 
e sommozzò 'nta ll'acqua nira 
Passò la notti a genti 'nta la rina 
tinennu l'occhi fissi supra ê fochi 
currennu ppi circari ligna 
e 'nzemula prigannu 
e d'ogni tantu sgrigghia si sintiva 
ca l'acqua di lu mari in luntananza ribugghieva 
spumava 
comu si un ferru arruvintatu 
Vurcanu avissi misu a bbagnu 'nta lu strittu

"Madonna mia chi è?" 
dicevunu li ggenti e si signava 
Ma che cos'era? 
Signore mie Signori miei era la lotta 
assai feroce 
chi Colapisci cummatteva 
Aveva a jessiri veloci cchiù d'un llampu 
chi masannunca Scilla si l'ambrancicava 
cchiù forti e cchiù possenti 
e di nun sacciu chi 
per non cadere dentro ai gorghi di Cariddi 
chi mancu i navi i guerra 
a chidda cci scappava 

Durò questo commattimento tutta a notti 
Scilla rapaci chi circava di ghermire 
Cariddi chi sugava e vomitava l'onde 
e Colapisci 'n menzu 
ca li vuleva 'ncatinari 
All'alba 
cû suli russu 
chi spuntava all'orizzonti 
dda fodda chi prigava a lu Signuri 
mentri na matri cci dava a minna ô figghiu 
quarcunu chi s'aveva addurmisciutu 

"Ohu? 
Chi fai? 
Arruspigghiati!" 
"Chi cc'è… chi voi?" 
"U focu… 
si sta stutannu disgraziatu… 
Va' cogghi a ligna 
lestu"

All'alba 
cû suli russu 
chi spuntava all'orizzonti 
si vitti ddu bbugghi bbugghi 
che veniva avanti prontamenti 
cci fu nu fuggi fuggi ggenerali 
che a tutti cci pareva fosse un maremoto 
e cc'era cu si confessava li piccati 
cu chianceva 
ma appoi si vitti che cos'era

Cu tutta a forza Colapisci strascinava 
Scilla e Cariddi 
'nguantate alla catena 
e quando le portò alla riva 
sulla rena 
ddi mostri 'mbarsamarunu sull'istanti 
chi si faciti un giru 'nto portu di Missina 
ancora li viditi 'ncatinati 'nta na funti.
Comu cuntari la maravigghia di presenti 
la gioia dâ matri 
'û patri 
'un si po' ddiri 
la ggenti ca 'llestiva 
ppi li festeggiamenti 

Ma Colapisci stancu era 
cci dissi 
"Faciti festa è giustu 
iò mi nne 'nnari 
nun pozzu stari ccà 
'nto funnu di lu mari iò vaju 
Saluti a vui 
câ bbona sorti"

 'Cussì la ggenti sò lu vitti annari 
e menu amara 
per quella memorabbile cattura 
divenne a vita di li piscatura di lu Faru 
e a chiddi ca passavunu du strittu 
senza periglio 
e ddumannavunu 

"Com'è chi non ci sunnu cchiù li mostri 
Scilla e Cariddi?" 
veniva raccontata l'abbintura 
Girò per mare 'nta lu munnu quella storia
finu a 'rrivari ê ricchi di lu Rre 
chi fu pigghiatu da la smania 
di vidiri quest'omu menzu pisci 
e di parlaricci 
era curiusu 
Adunqui detti un'ordini 'mperiali

"A tutti i piscaturi i marinara 
cu vidi Colapisci cci havi a diri 
ca lu sò Rre 
cci vo' parrari 
chi si facissi avvidiri a la reggia immantinenti 
a unni sarà accolto rricevuto e ospitatu 
assai benevolmenti" 

Passaru i jorna 
prima a simani e ddoppu a misi 
e i Colapisci mancu l'umbra 
o puramenti u ciauru i pisci si sintiva in luntananza

U Rre 
curiusu assai 
si fece preparare la carrozza 
e in pompa magna 
siccome si conviene a un re annò a lu Faru 
si fici diri a unn'era la casuzza 
di lu patri di la matri i Colapisci 
da un picciottu 
chi stava arriparannu la sò barca 
e chi cantava 
nu cantu deliziusu assai sfiziusu 
Rristò menz'ura u Rre 'ncantatu da lu cantu 
pinzannu a quanti cosi si pirdeva a fari u Rre 
appoi pinzò

"Megghiu 'un pinzari e cumannari" 
e mossi assieme a lu curteo dî curtiggiani 
Giunto chi fu vicinu a la casuzza 
vitti nu vecchiu 
intentu a lu cunzari a riti 
"Buongiorno dite 
voi siete il padre 
di quella maraviglia canasciuta 
al mondo come Colapesce?"

U vecchiareddu 
vutannu a mmalappena l'occhi 
"Ngnorsì 
Iò sugnu" 
"Ma comu? non ti suggi? 
Sono il tuo Rre 
no' vidi?" 
"Scusate Maestà 
ma non vi canoscevo" 
cci disse quello facendoci un inchino 

"Non mi conosci? e comu? 
Se la mia faccia è stampigliata 
su tutte le monete d'oru del reame" 
"Per questo allora io non vi arriconosco 
Muniti d'oru non n'hè vistu mai 'nta vita 
Scusate ancora Maestà 
ma non ci ho colpa 
Dicevo che mi parevate un gran signore" 
"Capisco" 
dissi lu Rre 
che invece non capiva nenti 

"Potete voi chiamare vostro figlio? 
Ca 'u vogghiu vidiri 
voglio con lui parlare" 
"Mé figghiu non lu vidu di tant'anni 
di quannu 'ncatinò li mostri 
Scilla e Cariddi 
ma tegnu a vecchia brogna 
pozzu pruvari" 
Pigghiò la brogna e cci ciusciò tri voti 
e prima ca finisse il suono 
cci avevano nnavanti a Colapesce

"Chiamastuvu patri 
chi vuliti?" 
"Figghiu chi sacciu? 
Cci avemu ccà lu Rre 
ti vo' parrari" 
"Diciti Maistà 
che io vi ascolto"

Lu Rre pareva addivintatu petra 
sturdutu si nni stava a bbucca aperta 
la guardia tutta avia 'mpugnatu l'armi 
ma trimava 
comu li fogghi quannu ciuscia u ventu i tramuntana 
e li ministri tutti 
s'avevano ammucciatu comu ê granchi 'nta la rina 
vidennu a Colapisci 
quali a un ddiu marinu rranni e pussenti

"Allura Maistà 
pirchì chiamastuvu 
chi vuliti?" 

"Iò veramente Colapisci 
aveva u desiderio di vedervi e basta 
ma ora chi mi siti ccà davanti 
mi vinni na ddumanna 
chi hè 'vutu sempri ppi la menti 
Lu regnu miu 
la mia Sicilia 
su cosa poggia? 
cosa fa galleggia? 
sutta c'è terra? 
o è comu a nu barcuni?" 

"Lu mari che circonda la Sicilia è assai profondo 
e iò 
ppi quantu hè summuzzatu nnâ me vita 
non n'hè pututu vidiri lu funnu" 

"Facitimi na grazia Colapisci 
nu piaciri 
scinniti a vvidiri comu si regge la Sicilia" 
"Va bbene lo saprete" 
e stava ppi calarisi nnô mari 
ma si fermò 
"Si mi spittati ccà 
facitivi purtari un trispu 
mi vi 'ssittati 
ca certu ppi tutt’oggi iò non ritornu" 
e sommozzò 'nta ll'acqua nira

Passò a jurnata 
e u jornu appressu 
cû Rre sittatu supra un trispu nnâ la rina 
e intantu s'era risaputa la notizia 
dû Rre di Colapisci 
e di la sò ricerca nnâ lu funnu 
e s'era radunata ddà na fodda 
ca tutti quanti vulevanu sapiri di stu fattu 
Ô patri 
â matri i Colapisci 
cci trema u coriceddu 
per li perigli di questa nova impresa 
e finalmente 
ô terzu jornu di ll'attesa 
emerge Colapisci 

Havi la facci 'mpizzata 
nell'espressione scura 
non tocca terra 
nell'acqua che cci arriva a lu bbiddicu 
lì si arresta 
apri li bbrazza 
e la sua voce dice

"A bbedda terra di Sicilia 
pisa 
pisa cu tuttu lu sò pisu 
supra a tri colonne 
una che è sana sana 
pari nova 
una na tanticchiedda smanciuniata 
ancora bbona 
la terza 
calannu 'n funnu 
sutta ô strittu di Missina 
è stata consumata da lu focu 
che per sotterra 
cci arriva comi a un ciumi 
da lu draguni Muncibbeddu dettu 
e la Sicilia tutta 
può ora sprofondare 
Si nni vuliti a vvidiri la prova 
eccu 
guardati"

Aprì li manu a pala 
e u focu 
nni li palmi li bbruciava 
appoi li misi dintra all'acqua 
e li sanò 
comu ppi magaria 
arcana e purtintusa 
Li ggenti disperava 
cu si strazzava i vesti 
li capiddi 
cu si cardava a facci 
e cu pregava

Lu Rre s'avia livatu la corona 
e la jittava 
ca persu era lu regnu 
stava 'nfunnannu 
ma Colapisci fermò ogni cosa con la voce 
col gesto della mano 

"Nun vi scantati 
fermi! 
Mi fazzu iò colonna ppâ mè terra 
ma vui 
vui 
tinitivvilla cara sta delizia" 
Lu Rre ripigghia la corona e si la metti 'n capu 
"Patri 
matri 
bbenedicitimi 
non nni videmu cchiù 'nta vita 
addiu" 

E rricivuta la bbinidizioni 
si sommozzò 
calò nnô funnu di lu mari 
e fu colonna 
ppi tutta a terra dâ Sicilia 
e si vui putissivu scinniri a vardari 
ddà 'u truvassivu 
ddà 'n funnu 
cû focu chi l'abbrucia 
e l'acqua ca lu 'rricria

Giuseppe Luciani
www.sicilia-ezine.it
Salvato dal WEB da Colapisci

www.colapisci.it