VISIÓNI SUSPIRÁTA

Ero giovane quando, ritornando dal nord con il treno, vidi per la prima volta tutta la gente che affollava il vagone,  guardare verso il mare, quasi che dal mare dovesse sorgere chissà quale meraviglia. Accadde dopo Gioia Tauro, ed anch'io assistetti al prodigio. Da allora mi resi conto che andare al nord vale la pena, non fosse altro che per l'intensa emozione che si prova nel ritornare.

Tutti  'ffacciàti,  'a  mpigna d'a nuttàta;

'ntall'occhi ancòra 'a nìgghia mpiccicùsa:

- Ora cumpàri, visiòni suspiràta,

arrèti  'i  'na muntàgna calabrìsa!-.

Davànti un celu chi mi dugna paci

e un mari azzùrru fittu, merlettàtu

di scumarèdda iànca chi fa luci

unni lu sciùttu mmesti c'u bagnàtu.

Marìna chi si cància la cammìsa

a la nisciùta di ogni gallirìa;

mi pari  'na sfilàta purtintùsa

chi la Calabria organizzàu pi mia.

'U suli c'u pinnèddu  'nta  'na manu

spamma culùri senza rispammiàri,

cull'àutra m'accarìzza chiànu chiànu,

e  'ddu tipùri mi fa suspiràri.

'U trenu curri a tàgghiu di custèra;

cumpàri e poi scumpàri 'nta marìna;

nzicca 'nta  'ddi purtùsi e torna fora;

si torci tuttu comu a 'na murìna.

- Ancòra  'na muntàgna  'i trapassàri!-

E dopu dû minùti  'i scuru fittu,

'a punta  'i Turrifàru mi cumpàri,

cu lu pilùni a guàrdia di lu strittu.

Vurrìa  ittàri schigghi a li presènti

comu a  lu marinàru cercatùri

quannu cumpàri terra all'orizzònti:

ma la mê stòria è stòria dilla genti!

Sû tutti ddà, cull'occhi spalancàti

nnigghiàti di miràculu e sgumèntu:

ch'i facci supra ô vitru  mpiccicàti

rènnunu gràzie a Diu pi lu purtèntu. 

Un fazzulèttu iàncu chi lampìa,

'na matri chi si strinci  'a criatùra,

un patri virgugnùsu chi tussìa,

un viaggiatùri stranu chi sculùra.

Un preti si cunfèssa avànti a Diu,

un senatùri russìa pi la virgògna,

un sìnnicu chi finci meravìgghia,

un magistràtu chi giustìzia sogna.

Itàlia chi non vanti  'i tô biddìzzi!

Sicìlia chi fai tortu alla Natùra,

chi t'accuntènti sulu d'i carìzzi

di 'na pulìtica orba e manciatùra!