Lu contrabbannu di porta di Crastu

'N'âtra vota cc'era un viddanu, ma di chiddi veru di li muntagni, chi stava facennu lu sò bisognu giustu vicinu la Chiesa di S. Trêsa.
Cci 'ncugna Firrazzanu, tuttu affatïàtu e cci dici:
– Cumpari, e chi stati facennu? 'Un sapiti ca ccà 'un è pirmissu di fari sti cosi? Stà vinennu la Giustizia e v'arresta!
Si vôta lu viddanu:
– Gèsu! e comu haju a fari si mi vidi?
– Subbitu, cugghìti tutti cosi, ammugghiativilli 'nta un muccaturi, e finisci.

 Firrazzanu comu cci dici accussì, si nni va, e va a trasi di porta di Crastu.
'Ncugna nni li supraguàrdii:
– Viditi ca stà vinennu un pedi-di-pilu (villano) ca porta un contrabbannu di sutta.
Li supraguàrdii si misiru a lenza; quannu lu viddanu trasíu cu l'ammògghiu di sutta, lu chiamaru:
– Cumpareddu, favuriti
Lu viddanu fici la morti ch'appi a fari.
Li supraguàrdii cci pigghiaru l'ammògghiu e lu sbrugghiaru. Comu vìttinu dda pitanza nni vulìanu centu  cu 'na majorca (Voler ragione ad ogni modo, voler soddisfazione); ma lu viddanu cci cuntau la cosa, ca un cristianu mentri iddu facía lu sò bisognu cci avía dittu di susirisi, e cògghiri tutti cosi, pirchì stava vinennu la Giustizia, e lu putía truvari supra lu fattu.
Li supraguardii dissiru:
– 'Nca pi chissu Firrazzanu nni detti l'avvisu! Minchiuna nuàtri ca nni ficimu livari di li so' paroli!

Palermo.

Giuseppe Pitrè
Fiabe novelle e racconti popolari siciliani
Vol. III

www.colapisci.it