Variante di "Giufà fa il medico

L'apprinnista di lu medicu

'Nna vota cc'era un medicu chi jia a fari li visiti cu lu sò Apprinnista.
'Nna jurnata avennu vistu un malatu, cci dissi:
- Ah! 'nquà nu' nni vuliti sèntiri nenti ca nun aviti a manciari?
- Signuri, cci assicuru chi nun haju manciatu nenti, dissi lu malatu.
- Gnurnò, arrispunníu lu medicu, ca jeu trovu lu pusu di racina; veni a diri chi aviti manciatu racina.
Ddocu lu malatu, cunvinciutu, dici:
- Ora chi voli! Veru è ca mi la manciai la racina, ma un sgangu fu
- Bonu; 'un v'arrisicati cchiù a manciari, pirchì pri minchiuni a mia nun mi cci pigghiati.

Lu poviru Apprinnista chi java cu lu medicu arristau amminchiunutu com'è chi lu sò maistru 'nsirtava di lu pusu ca chiddu avía manciatu racina; e subbitu chi nisceru cci spijau:
- Maistru, d'unni si nn'addunau ca chiddu avía manciatu racina?
- Senti, cci dici lu medicu, unu chi va a visita un malatu, pri minchiuni nun cci havi a passari mai; allura chi trasi metti l'occhiu pi tuttu lu lettu, e sutta lu lettu puru; e da  ddi muddichi chi vidi, s'adduna di 'nsocchi ha manciatu lu malatu. Jeu  vitti la rappugghiadi la racina, e di ddocu cci 'nsirtai ca chiddu avía manciatu la racina.

Succedi la 'nnumani matinu ca cc'eranu malati assai 'nta lu paisi, e lu medicu 'un putennu arrivari a fari tutti li visiti, mannau lu sò Apprinnista a visitàrinni 'na pocu. 'Nta di l'àutri l'Apprinnista va e va nni ddu malatu chi s'avía manciatu la racina, e vulennu fari 'na parti di 'spertu comu lu sò maistru, pi fari vìdiri ch'era medicu viriticu, comu s'adduna ca sutta lu lettu cc'eranu fila di pagghia, cci dici arrabbiatu:
- Ma vui nun vuliti sèntiri nenti, ca nun aviti a manciari!
Dici lu malatu:
- Cci l'assicuru jeu, ca mi purría cumunicari ca nun haju tastatu l'acqua.
- Gnursì, dici l'Apprinnista; vui manciàstivu pagghia, ca nni viju li fila sutta lu lettu.
E lu malatu di bottu:
- E chi m'ha pigghiatu pi sceccu com'è vossia?

 E l'Apprinnista fici la figura di ddu minchiuni e chi era.
 

 Altra variante.
Due medici, de' quali uno era di gran fama e molto ricco: ma con poca dottrina, l'altro veramente dotto, ma molto povero.
Il medico ignorante trova nel letto dell'ammalato una pelle d'asino e chiede all'ammalato se abbia mangiato dell'asino.
L'ammalato dà dell'asino al medico.
Straparola, Tredici piac. notti, VIII

Giuseppe Pitrè
Fiabe novelle e racconti popolari siciliani
Vol. III

www.colapisci.it