Firrazzanu e chiddu di l'ova

Firrazzanu e chiddu di l'ova

'Na vota Firrazzanu scuntrò, unu chi vinnía ova; lu 'mpinci e cci dici:
– A vui cull'ova; su' frischi?
– 'Nca vidìtili.
Pigghia Firrazzanu, e cci fa mettiri li vrazza tuttidui 'ncucchiati, e cci dici:
– Aspittati un pizzuddu quantu mi nni addiju 'na zuzzìna (scelga una dozzina).

E chi fa?
Cumincia a nèsciri a unu a unu l'ova di lu panaru e cci li metti supra li vrazza. Chiddu cci cridía. Quannu cci parsi a iddu ca chiddu cull'ova 'un si putía arrimiminari cchiù, cci sfigghia li càusi e si nni va.

Ddu puvireddu si vitti sciddicari li càusi e si misi a gridari; ma lu fattu è ca cchiù chi gridava cchiù genti s'arricugghìanu, e videvanu a stu cristianu ca pi 'na manu si strincía tuttu p' 'un si fari vidiri comu lu fici sò matri; e pi n'àutra manu avía lu scantu ca muvènnusi cci cadevanu tutti l'ova e facia 'na fròcia (frittata) .

Ficarazzi

Giuseppe Pitrè
Fiabe novelle e racconti popolari siciliani
Vol. III