Variante di "Giufà e l'asino che manca"

Chiddu di li scecchi

 'Na vota cc'era un viddanu chi purtava 'na ritinata di scecchi. Li scecchi eranu tridici, e n'àutru nn'avía di sutta iddu. 'Nca caminannu caminannu juncíu 'nt'ôn paisi; cc'era 'na festa, e si misi a'llianari vidennu zoccu si facía 'nta lu paisi. Quannu fu ura di jirisinni e sicutari lu sò caminu cunta li scecchi, e nni trova unu di menu: eranu dudici.
Dici:
- Ah, mischina mia! ca un sceccu mi manca!... E com'hê fari?...
E li cunta:
- Unu, dui, tri, quattru... sina a dudici... - pirchì lu sceccu suo 'un cci lu mittía.
Cunta arréri; ed eranu dudici; lu puvireddu si misi a chianciri ca cci avìanu pigghiatu un sceccu.
Lu scontra un vurdunaru:
- Cumpari, ch'aviti?
- E ch'haju ad aviri!.. ca avía tridici scecchi e mi nni trovu dudici!...
 - Veru, cumpari?  - e si metti a cuntari li scecchi; cunta li scecchi ed eranu tridici;
dici:
- E 'un su' tridici?
 - Gnirnò, dudici sunnu: taliati: unu, dui, tri, quattru, cincu, sei, setti, ottu, novi, deci, unnici e dudici!
- E chiddu ch'aviti di sutta?...
Comu senti accussì lu viddanu dici:
- Aviti raggiuni, cumpari; avia lu sceccu di sutta e mancu mi nn'addunava!

Palermo